𝗩𝗼𝗮𝗹𝗼𝗵𝗮𝗻𝘆 𝘁𝗮𝗺𝗶𝗻’𝗻𝘆 𝗳𝗶𝗳𝗮𝗻𝗶𝗻𝗮𝗻𝗮𝗻𝗮 « 𝘃𝗼𝗸𝗮𝘁𝗿𝗮 𝗺𝗲𝗻𝗱𝗿𝗶𝗸𝗮 𝗶𝗻𝗱𝗿𝗶𝗻𝗱𝗿𝗮 », F𝗮𝗿𝗶𝘁𝗿𝗮 𝗕𝗼𝗲𝗻𝘆 | 𝗠𝗮𝗷𝘂𝗻𝗴𝗮

Tsimponina ny fako sase plastika, diovina tsara ka rarina ho lasa arona, ondana sy fitaovana maro isankarazany izay azo ampiasaina amin’ny andavanandro ao an-tokatrano.

Ny fikambanana « Baobab » ao Mahajanga izay manome lanja an’ireo fako sase plastika ireo ho lasa fihariana no nibata ny fandresena tamin’ireo fikambanana maro nifaninana manerana ny Nosy.

Fitaovana maro no natolotr’i Ramatoa Minisitry ny Mponina Michelle Bavy Angelica ho azy ireo ary noamafisiny fa mila mikaroka sy mamokatra ireo vehivavy.

Velom-pisaorana ireo vehivavy ao amin’ny fikambanana Baobab satria fitaovana tena ilainy amin’ny fanafainganana sy ny fanatsarana ny vokatra no azony. Mangataka ireo mpikambana mba ahazo tombony eo amin’ny sehatry ny fanondranana any ivelany ka mila tsorina kokoa ireo antontan-taratasy ilaina amin’izany izay mbola sarotra dia sarotra amin’izao fotoana izao.

Ireo manam-pahefana vehivavy kosa dia nanamafy fa efa mahazo setra ny vehivavy ao Mahajanga na eo amin’ny seha-pihariana na eo amin’ny fitantana andraikitra ambony. Azontsika hoy izy ireo ny zo-ntsika ka mila tohizana ny fampisongadinana ireo vehivavy eo anivon’ny fiaraha-monina.