MAROANTSETRA, miasa ho an sokajin’olona rehetra ny Minisiteran’ny Mponina hoy ny Minisitra Michelle Bavy Angelica

Taorian’ny fandalovan’ny rivodoza Eloïse dia nidina tany an-toerana ny Praiminisitra Ntsay Christian, notronin’ireo mpikambana sasantsasany ao amin’ny governemanta ary anisan’izany ny Minisitry ny Mponina Michelle Bavy Angelica.
Ho fanamafisana izany dia nisy ny fihaonana tamin’ireo solontenan’ny Zokiolona sy ny fikambanam-behivavy isam-pokotany ary ireo olon-tsotra liana amin ny asa fampandrosoana.
Ho an’ny Maroantsetra manokana dia nambaran’i Ramatoa Minisitra fa :
• omena fihofanana momba ny asa fivelomana na AGR ny vehivavy, ka manomboka amin’ny volana febroary no hisy fampihofanana momba ny fiompoana akoho gasy sy fanatavesana gana izay mety tsara amin’ny toe-tany ao Maroa ;
• hentitra izy amin’ny ady atao amin’ny herisetra izay tsy mendrika ny vehivavy.
Nizara ny hetahetany ireo zokiolona izay nangataka ny fanafainganana ny fivoahan’ny karatra maintso. Nangataka fampitaovana ihany koa ireo olona tra-pahasembanana izay tsy afa-mivoaky ny trano amin’ny alalan’ny fanampim-tongotra sy ny seza korisa.